கண்டி – கொழும்பு வீதியின் கேகாலை, மொலகொடை பகுதியில் தனியார் பஸ், லொறி, 2 வேன்கள், 2 முச்சக்கர வண்டிகள்,மோட்டார் சைக்கிளுடன் மோதி விபத்திற்குள்ளானதில் ஒருவர் உயிரிழந்து 10 இற்கும் மேற்பட்டோர் காயம் அடைந்தள்ளதாகப் பொலிஸார் தெரிவிக்கின்றனர்.
கொழும்பு – கண்டி பிரதான வீதியின் மொலகொடை பகுதியில் இன்று திங்கட்கிழமை (22) அதிகாலை வேளையில் இடம்பெற்ற தொடர் வாகன விபத்தில் சிக்கி 70 வயது மதிக்கத்தக்க மூதாட்டி ஒருவர் உயிரிழந்துள்ளதுடன், மேலும் 12 பேர் காயமடைந்துள்ளனர்.
கண்டியிலிருந்து கொழும்பு நோக்கிப் பயணித்துக் கொண்டிருந்த தனியார் பஸ் ஒன்று, அதற்கு எதிர்த்திசையில் (கொழும்பிலிருந்து கண்டி நோக்கி) பயணித்த இரண்டு முச்சக்கர வண்டிகள் (Three-wheelers), இரண்டு வேன்கள் (Vans), ஒரு லொறி, மோட்டார் சைக்கிள் ஆகியவற்றுடன் அடுத்தடுத்து மோதி இந்த விபத்து சம்பவித்துள்ளது.
விபத்தில் கடுமையான காயங்களுக்குள்ளான 12 பேர் உடனடியாக மீட்கப்பட்டு கேகாலை பொது மருத்துவமனையில் அனுமதிக்கப்பட்டனர். எனினும், முச்சக்கர வண்டியின் பின் இருக்கையில் பயணித்த மூதாட்டி ஒருவர் சிகிச்சை பலனின்றி உயிரிழந்துள்ளார்.
உயிரிழந்த மூதாட்டி சுமார் 70 வயது மதிக்கத்தக்கவர் என மதிப்பிடப்பட்டுள்ள போதிலும், அவரது அடையாளம் இதுவரை உறுதிப்படுத்தப்படவில்லை எனக் காவல்துறையினர் தெரிவித்தனர்.
விபத்துடன் தொடர்புடைய பஸ்ஸின் சாரதி கேகாலை காவல்துறையினரால் கைது செய்யப்பட்டுள்ளார்.
இக்கோர விபத்து குறித்த மேலதிக விசாரணைகளைக் கேகாலை மாவட்டக் காவல்துறைப் பிரிவினர் மேற்கொண்டு வருகின்றனர்.
கௌசல்யா
