இலங்கையின் கல்வி முறையில் STEM சிறந்ததா STEAM சிறந்ததா? என்ற கேள்வி கல்விச் சமூகத்தினர் மத்தியில் பரவலாகப் பேசப்படும் ஒரு விடயமாகும்.

என்னைக் கேட்டால் ஓர் ஆசிரியன் என்ற வகையில், ஸ்டீம் கல்வி முறையே நாட்டின் செழிப்புக்கு வலு உந்து சக்தியாக விளங்கும் என்பேன்.

இலங்கையில் 2023 மார்ச் மாதம் 31 ஆம் திகதி ஆரம்பித்து வைக்கப்பட்ட இந்த STEAM கல்வி இன்னும் எழுந்து ஓடத் தொடங்கவில்லை.

STEMகல்வி:

S: Science
T: Technology
E: Engineering
M: Mathematics

இதற்கமைவாகவே இலங்கையில் கலைத்திட்டம் உருவாக்கப்பட்டு பாட உள்ளடக்க கட்டமைப்பு ஏற்படுத்தப்பட்டது.

ஆனாலும், இலங்கை எந்த விதத்திலும் உருப்படவே இல்லை என்றுதான் சொல்ல வேண்டும்.

மாறாக, STEM கலைத்திட்ட முறையிலான கல்வியினைப் பெற்ற கல்வி அதிகாரிகள்; மருத்துவர்கள்; பொறியியலாளர்கள்; சட்டத்தரணிகள் போன்றோர் அத்துறையிலே நிபுணர்களாக (Consultant) வந்தனரே தவிர, அதனால், இலங்கைக்கு எந்த நன்மையும் ஏற்படவில்லை.

ஆனால், கடந்த காலங்களில், C.W.W.கன்னங்கர; பேராசிரியர் துரைராஜா போன்றோர் நாடு சார்ந்து பல அபிவிருத்திகளுக்கு ஆலோசனையிட்டு நாட்டினை மேன்மை செய்துள்ளதுடன் நாட்டிற்கு பெருமை சேர்த்தும் உள்ளனர்.

உதாரணமாக: கொழும்பு உலக வர்த்தக மையம் (உருளை வடிவ 35 மாடி கட்டடம்) கட்டடம் கட்டிக்கொண்டிருந்த போது, 30 மாடியை கடந்ததும் அது சரிவு நிலையில் காணப்படத் தொடங்கியது. அந்த நேரம் இலங்கை Engineers உதவி கேட்டு ஓடிய இடம் ஜப்பான்.

அவர்களிடம் இதற்கான ஆலோசனை கேட்ட போது “உங்கள் நாட்டில், Jaffna வில் Professor துரைராஜா என்றொருவர் இருக்கிறார். அவர் இதற்கான ஆலோசனைகளை வழங்குவார்” என்றனர்.

“Soil Theorem” ஐ உருவாக்கியவரும் இவரேதான்.

அந்த உலக வர்த்தக நிலைய மாடிக்கட்டடம் இலகுவாய் சீர் செய்யப்பட்டது. இன்று இலங்கையின் ஓர் அடையாளமாக அது மிளிர்கிறது.

இதேபோல்தான், களனிப்பாலம் ஓவல் சேப்பில் (Oval Shape) (முட்டை வடிவ வளைவு) ஒற்றைத் தூணில் அமைத்து சாதனை படைத்த கல்வியாளன், அவர்.

இப்படியான சாதனைகளும், மெருமைகளும் இன்று இங்கு இல்லையே..!

எமது கல்வித் திட்ட முறைமையில் சரியான போக்கு இல்லை என்பதையே இது எடுத்துக் காட்டுகின்றது.

தரம் 5 புலமை பரிசில் பரீட்சையில் Pass
O/L சோதனையில் 9A பெறுபேறு
A/L சோதனையில் 3A பெறுபேறு

என சாதனை படைக்கின்ற மாணவர்களுக்குத் தங்கள் உயர் கல்வியால் தமக்கும் தம்முடைய நாட்டிற்கும் என்ன நன்மையினை உண்டாக்கலாம் என்ற சிந்தனை போக்கு அந்தக் கல்வியில் காணப்படுவதில்லை.

பெரும்பாலும், இன்றைய மருத்துவர்கள் பலர் நோயாளிக்கான நோயைக் கண்டுபிடித்து சிகிச்சை அளிப்பது குறைவு.

நோயாளியிடம் உள்ள அறிகுறிகளைக் கேட்டுவிட்டு, “இந்த மருந்தினைக் கொடுத்து பார்ப்போம்” என்று ஊக அடிப்படையில் வைத்தியம் செய்வதையும் காணமுடிகிறது.

இந்தநிலை “இலங்கையில் மருத்துவம் சாவடைந்துள்ளது” எனும் போக்கினையே காட்டுகிறது.