குவைத்தில் இலங்கைப் பணிப்பெண்கள் இருவர் மர்மமாக மரணமடைந்தமை குறித்துக் குவைத் பொலிஸார் விசாரணைகளை ஆரம்பித்துள்ளனர். இருவரும் இயற்கைக்கு அப்பால் உயிரிழந்திருப்பதாக வழக்கு பதிவுசெய்து விசாரணைகள் முடுக்கிவிடப்பட்டுள்ளன.
குவைத்தின் இரு வெவ்வேறு பகுதிகளில் இலங்கை பெண்கள் இருவர் மர்மமான முறையில் உயிரிழந்துள்ளனர்.
அலி சபா அல்-சேலம்,அல்-நஹ்தா ஆகிய பகுதிகளில் உள்ள வீடுகளில் இருந்தே இவர்களின் சடலங்கள் மீட்கப்பட்டுள்ளன. இவற்றை குவைத் பொலிஸார் இயற்கைக்கு அப்பால் நடந்த மரணம் என வழக்குகளைப் பதிவு செய்து விசாரணைகளைத் தொடங்கியுள்ளனர்.
முதல் சம்பவமாக, அலி சபா அல்-சேலம் பகுதியில் உள்ள வீடொன்றின் கூரையில் அமைக்கப்பட்டிருந்த களஞ்சிய அறையிலிருந்து பெண் ஒருவர் சடலமாக மீட்கப்பட்டுள்ளார்.
வீட்டு உரிமையாளர் அளித்த தகவலின் பேரில் அஹ்மதி பொது குற்றவியல் பிரிவு இது குறித்த விசாரணைகளை மேற்கொண்டு வருகிறது.
இரண்டாவது சம்பவமாக, அல்-நஹ்தா பகுதியில் உள்ள வீடொன்றில் மற்றொரு இலங்கை பெண் சடலமாக மீட்கப்பட்டுள்ளார்.
சம்பவ இடத்திற்குச் சென்ற ஜஹ்ரா பொது குற்றவியல் பிரிவு தடயவியல் நிபுணர்களுடன் இணைந்து சான்றுகளைச் சேகரித்துள்ளது.
குவைத்தின் ‘அரப் டைம்ஸ்’ நாளிதழின் செய்தியின்படி, இரு மரணங்களும் சந்தேகத்திற்கிடமான முறையிலேயே இடம்பெற்றுள்ளதால் சடலங்கள் பிரேத பரிசோதனைக்காகத் தடயவியல் பிரிவுக்கு அனுப்பி வைக்கப்பட்டுள்ளன.
இந்த இரண்டு உயிரிழப்புகளுக்கும் இடையே ஏதேனும் தொடர்புகள் உள்ளதா அல்லது இதில் தொடர்புடைய சந்தேக நபர்கள் எவரேனும் அடையாளம் காணப்பட்டுள்ளனரா என்பது குறித்த தகவல்களைக் குவைத் அதிகாரிகள் இதுவரை வெளிப்படுத்தவில்லை எனக் குவைத் ஊடகங்கள் தெரிவிக்கின்றன.